اليوم تبدأ امتحانات المدارس
افتح على اذاعة القرآن الكريم
اسمع المذيع في برنامج تباشير الصباح و هو يدعو للطلبة بالتوفيق
و بالعمل اسمع الامهات و هن و يدعون لابنائهم بالتيسير
و انا اضحك ..
اتذكر ايام الامتحانات العصيبة !
على رغم ألمها
الا انني في هذه الايام اشعر بحلاوتها ..
.
..
.
من اجمل اللحظات ( الريوق ) بعد الامتحان !
امي بالدوام
و انا و اخواني نفنتق
يوم مطعم و يوم بالبيت !
ولا كأنة كل يوم نتريق !
لكن حتى طعم الاكل بعد ان ينزاح هم الامتحانات يكون غير !
و بما اني البنت الصغيرة و الوحيدة حزتها
فاستغل وجود اخواني الصبيان اذا كان من مطعم
و يستغلون وجودي اذا كان بالبيت
.
..
.
في العمل هناك الكثير من الامور يجب ان تنجز
و خارج العمل هناك الاكثر !
ينتهي وقت الدوام ..
اخرج احمل معي افكاري و اغراضي
و اذا بطفل بثياب المدرسة !
لا يتعدى عمره اثنى عشر عاما يقول لي :
يصير توصليني البيت ؟ ريلي تعورني ما اقدر امشي !
طبعا انا سكت فترة و فكرت
في لحظة كنت راح اوافق !
لكن استوعبت
ان شي شبه مستحيل
مو لاني مستعيلة لكن مهما كان ماعرفه لو يصير شي اتوهق !
رفضت و رديت عليه :
ودي اوصلك بس مستعيلة !
قالي بيتنا قريب ما راح ياخذ منج وقت
رديت عليه و اشرت على رجل يفتح سيارته ..
اسأل الريال يمكن يقدر يوصلك .. انا ما اقدر !
.
..
.
اعترف ..
اني مشيت و انا افكر في هذا الطفل !
ادمعت عيني و ضاق خلقي عليه !
وين امه !
وين ابوه !
ليش بالشارع بروحه !
ليش محد يسأل عنه !
المشكلة ان مو المرة الاولى الي اصادف اطفال بدون والدينهم او احد كبير !
و المشكلة الاكبر اني دايما احس اني مسؤولة عنهم و اشيل همهم !!
هل اتكلم عن مبارك الي انكسرت ريوله و اهو يلعب بحديقة الشعب و امه مخليته بروحه مع الخدامة
و لما دقيت عليها زفتني !
ولا عن نورة الي ما يتعدى عمرها سنتين بافنيوز صاعده على الكرسي تطل من الدور الثاني و بروحها و لما خذيتها نامت بحضني !
و لما لقيت امها و سألتها وين كنتي عن بنتج !
قالت كنت اتسوق !!
و مواقف كثيرة !!
الي ما يتحمل مسؤولة اطفال لا يتعب نفسه فيهم !!
..
.
اطفالنا اتخذوا الشوارع مسكنا أفينبغي ان نهمل الصبيانا
اباؤهم لا يرحمونهم و لم يجدوا بصدر الامهات حنانا
فيشب و الفحشاء ضرع لبانه و الذنب ذنب رجالنا و نسانا
12 comments:
لكل مجتهد نصيب و هذا الميدان ياحميدان :)
و على الإهمال ... أعتقد إن كل أم لديها عاطفة أمومة حقيقية تقوم بعمل كل ما تستطيع لتأمين رعاية جيدة لأطفالها
أحيانا الياهل يكون سريع .. لذلك مانقدر نحط اللوم دائما على أولياء الأمور
و بالمقابل مثل ماقلتي ... تتفاوت درجات الإهمال من أسرة إلى الثانية
فالإهمال ماياخذ شكل واحد... يعني ممكن يكون طفل أمه محافظه عليه و لازق فيها اربعة و عشرين ساعة .. لكنها أهملت في تعليمه الابتعاد عن الألفاظ البذيئة أو أهملت في تعليمه احترام كبار السن
وهكذا .. و الله يحفظ عيالنا يارب ... أخيرا ... يبتلى الأهل أحيانا بأبناء لو مهما فعلوا لهم .. بيأذون نفسهم
أثرتي في نفسي الألم والشجون :"
لا أدري هل قضية التكاثر قضية فطرية وانتهى ...... وإكثار أمة محمد شكلاً لا ضمنًا ؟؟؟ أم أن القضية قضية روتين وانتهى !
:"
شكرًا قيادية .....
والله شوقي لأيام الاختبارات شوق كبير
^_^
صحيح اني كنت انتظر انتهائها بفارغ الصبر إلا انني الآن اشتاق اليها
الصراحه يحرون هالأهل... الله يهديهم اصلاً من حرتي بغيت ابجي معاج
حتى ابن الوردي محتر معانا
دموعٌ يستبقنَ إلى النحورِ ... ونيرانٌ تشبُّ منَ الصدور
allah yahdeey ahalhooom !! 3ayaal eshloon el yahaal yen7arfoon .. min hal ta9arofaat .. min ahmaal ahalehoom lehoom !!
جنّه البوست يضيق الخلق؟
أولاً:
حده عقب الامتحان يصير الأكل لذيذ وجّنج أول مرة تاكلينه وتكون شهيتج مفتوحة
;p
وكل الناس يشتطون عالامتحانات وتروحين الجمعية تلقين عيال المدارس طالعين يتريقون عقب الفاينل
;Pp
ثانيًا:
الطفل البريء هذا من وين ياي؟
وليش وايد ناس يخلون عيالهم يتمشون وينسونهم ؟
شلون أحد ينسى ولده وإلا بنته؟
:(
شي غريب ودرجة اهمال فضيعة وفي ناس لما يصير بولدها شي يقولون عادي في غيره وساعات كثرة اليهال بالبيت ما يدرون منو موجود منو مفقود وصج هالشي أنا عشته !
لأنج تحبين اليهال تلقين وايد يهال ضايعين
;p
الله بيحاسب كل مقصّر ولا يضيق خلقج صديقتي
;**
شدعوة الولد ما يقدر يمشي خطوتين من المدرسة الى بيتهم!
الله يذكر ايام الثانوية كنا نرجع البيت مشي الساعة 1 بالقيظ والشمس على ظهورنا.. ونروح مشي الساعة 6 ونص الصبح ايام الشتا برد موت والشمس ليلحين ما طلعت
عيالنا صاروا دعلة ما يتحملون ادنى تعب.. ترى كل طلاب مدارس العالم يروحون مدارسهم مشي.. بأوروبا وامريكا ناهيك عن الدول الفقيرة.. الا عيال الكويت مرتزين بالسيارات مع السواق.. ومسافة البيت من المدرسة دقيقتين ونص مع الزحمة!!
ما تسوى الدمعة على تعب عيالنا يا قيادية.. الا الدمعة على هممهم وعزايمهم اللي راحت!
الله لا يحطني بمحطج مع الياهل
لأنه صج موقف صعب وماتدرين شنو تسوين
ناس مو محصلين يهال ..
وناس يقطون عيالهم بالشوارع ..
ماراح يحسون بقيمتهم إلا إذا صار شي
الله لا يقولها
الله المستعان .. وأنا مع بن همام
عذوب :
بالفترة الاخيرة اكثرت مشاغل الحياة
و نعذر اولياء الامور في بعض التصرفات ..
مهما كان اهم بشر
ما اقولج لازم يجابلونهم 24 ساعة و ما يبتعدون عنهم
لكن بالفترة الاخيرة صار في اهمال واضح و قاعد يأثر على سلوكيات الاطفال
و قاعده اشوف هذا الشي بالمدارس او حتى خارجها ..
الله يهدي الجميع ان شاء الله ..
خيال المآتا :
الله يعين ..
عفوا حياج الله ;)
iconz :
انا بعد
كانت تعطي لذة للايام ..
و خاصة النتيجة لما تكون بعد التعب
لها نكهة خاصة ..
recoletos :
الله يبعدنا عن النار ;p
ما عرفتج و انتي بالعربي متنكرة ;p
cream milk :
الله يعين :)
shello :
لا ما يضيق الخلق ;p
لو يت على هذا بس ..
وين ما اروح
القى يهال ضايعين متعورين يبجون
و انا اقعد اسكت و اعطي حلاو ايي و احطلهم بارني ;p
الحارث بن همام :
انا عندي قناعة
ان الانسان ما يسأل الا اذا كان صج محتاج !
الطريقة الي طلب فيها ما كانت طريقة انسان يتدلع
يمكن صج كان تعبان
و بعدين الولد صغير
يعني ليلحين مو العمر الي نخليه بروحه
و طلاب العالم يوفرون لهم شوارع صالحة للمشي
الجو يساعد
انا عشان دوامي حق المواقف لازم نخطر شارع
مجرد ما نخطر بس شوف شنو ممكن يصير فينا !
اذا ما كان واحد ما يقدرك و يشخط عليك
شوف الكلام الي يوصلك !
انا اخواني بفترة الثانوية يردون مشي بعض المرات و ما عندنا مشكلة
لكن امي و ابوي يتابعون الموضوع اول باول و يشوفونهم متى يردون
الحين روح الجمعية بعد ما يخلصون الامتحان
خل الشباب على جنب طول عمرنا نشوفهم بالجمعية
لكن لما نشوف بنات س 1 بالجمعية و الامتحان مخلص من الساعة 10
و يعفسون الجمعية و قاعدين على الدري صراخ و ضحك و يطفرون راعي الكاشير و ما يبقى هندي ما اذوه
طبعا غير الاشياء الي تصير مع الصبيان !
هني ما يخطر على بالك و تقول وين اهلم !
ليش ما يدرون عن بناتهم !
صارت س 1 و البنت ما ارجعت البيت
المفاهيم تغيرت ..
و الاهمال واضح عند بعض الاهالي ..
و الله الهادي :)
اجتماعي :
ان شاء الله يحسون بقيمتهم بوجودهم ..
صراحة
ما ردني عن الياهل الا الخوف من ابوي..
ادري ما راح يرضى من باب ان ما ابتلش فيه و يصير شي ..
ابوي يعرفني بالسوالف هذي ;p
حالمة :
رديت على بن همام
و هو رأي و نحترمه اكيد :)
Post a Comment